Giro aparta Ferixa Nausikoetako lehenengo asteburuan

Giro ezin hobeagoarekin amaitu da Elorrion Ferixa Nausikoetako lehen asteburua, giroari zein eguraldiari dagokionez. Egitarauan tartekatuko ekitaldi gehienak jendetsuak izan dira eta jendeak gogo honez hartu ditu aurtengo berrikuntzak, batez ere txosnak plazako frontoian jartzea.

Jaiei hasiera eman zion txupinazo ekitaldi jendetsuaren ostean, hainbatek gaua luzatu eta domeka goizean egindako Abere eta Nekazaritza Azokarekin lotu zuten. Tarte horretan, laguntza medikoko zerbitzuek adingabeko lau gazte artatu zituzten intoxikazio etilikoengatik.

Aurtengo feria ederra izan zen benetan eta bertaratutako ekoizleek gustura joan ziren egindako salmentekin. Aurten prestatutako postu onenen sariak Gatikako Maria Rosario Etxebarriak eta Elorrioko Iker Alberdik eskuratu zituzten.

Atzo, koadrilen arteko bazkaria egin zen Aldatzekuan. 1600 lagun inguru bildu zen bertan eta bazkari ostean jaitsiera koloretsua egin zuten plazaraino. Jai batzordeak jolas berriak prestatu ditu aurten, lehiakortasun maila jaisteko asmoarekin, eta bertan 28 taldeko ordezkarien ‘lehiaketa’ entretenigarria eskaini zieten plazan bildutako ikusle ugariei.

Eten barik

Jaien egitarauan ez da etenik izango eta gaurko protagonista nagusiak umeak izango dira, hiru haur parke atondu baitira beraientzako herriko gune desberdinetan. Goizean 12.00etatik 14.00etara egongo dira irekita eta arratsaldean 17.00etatik 20.00etara.

18.00etan buruhandiak ibiliko dira Herriko plazan eta inguruko kaleetan eta 19.00etatik aurrera Iskanbila taldeak girotutako umeen berbena egongo da Urarka inguruan.

Arratsaldeko 18.00etan Eleizalde futbol zelaiko berdegune berria inauguratzeko partidua jokatuko dute CD Elorrio eta Athletic Clubeko nesken taldeak.

Eguneko egitaraua iluntzeko 20.30ean Txosnagunean egongo den kafe bereziarekin eta zine forumarekin osatuko da.

Umeak izango dira protagonista nagusiak bihar ere, arratsaldeko16.30etatik aurrera Txintxirri Ikastolak antolatutako jolasak egongo baitira plazan eta jarraian Elorrioko Txirrindulari Elkarteak prestatutako ginkana hasiko da. Egitaraua buruhandiekin, txokolatadarekin eta Ganso & Cia konpainiak eskainiko duen ikuskizunarekin jarraituko du.

Txosangunean sukaldaritza eta zirkuko teknika desberdinen tailerrak egongo dira arratsaldeko seietatik aurrera eta gauean afaria eta Ekia musika taldearen saioa egongo da.