Gazte abadiñarrek gogoko dituzten ekimenekin osatu du Udalak uztaileko jardueren agenda

Gazteen lehentasunen arabera antolatutako ekimenen agenda zabala prestatu du Abadiñoko Udalak uztailerako.  Izan ere, 13 eta 17 urte bitarteko gazteek aisialdirako hainbat proposamen bozkatzeko aukera izan zuten eta aste buru honetatik aurrera aukeratutako hainbat proposamenekin gozatu ahal izango dute Abadiñotik irten barik.

Prestatutako jarduerak asteburu honetako zapatuan eta domekan abiatuko dira, Matienako Traña plazan eta Zelaietako Txanporta plazan hurrenez hurren, egongo diren bideo jokoekin. 11:00etatik 13:00etara eta 17:00etatik 20:00etara bideo-kontsolak dituen kamioian kokatutako tresna elektronikoekin jolasteko aukera izango dute 13 eta 17 urte bitarteko gazteek.

Hilaren 21ean, 22an eta 23an berriz, eskalada ikastaroa egingo da Matienako rokodromoan, 10 laguneko taldeentzat 9:30etik 13:30era. Guztira, 30 lagunek parte hartu ahal izango dute, beraz, izena aldez aurretik eman beharko da uztailaren 16ra arte, Errota Kultur Etxean edo Udal Mediatekan.

Freestyle Bike erakusketa

Hilaren 24an, Freestyle Bike erakusketa eskainiko du Funbox Factory taldeak. Ordubeteko bi saio programatu dira –18:00etan eta 20:00etan–, eta sarrera doan izango da. Hala ere, gonbidapenak aldez aurretik jaso behar dira Errota Kultur Etxean edo Udal Mediatekan.

Udalak antolatu dituen jarduera hauen helburua “adin tarte horren gustuetara eta nahietara ahalik eta gehien egokituko den aisia eta denbora libre eskaintza zabala eskaintzea da”, Argi Abad Kultura eta Gazteria zinegotziaren arabera.

Gazteek emandako iritzia kontuan hartuta, paintball saioak egongo dira Astola futbol zelaian hilaren 29an, lehena 11:00etatik 14:00etara eta bigarrena 17:00etatik 19:00etara. Abadiñoko gazteek gehien bozkatu zuten jarduera hau 12 eta 17 urte bitarteko gazteei dago zuzenduta. Izen-ematea uztailaren 26a orduko eman beharko da Errota Kultur Etxean edo Udal Mediatekan.