GaztARDOgi Ferixak 19 produktore bilduko ditu Izurtzan larunbatean

Izurtzan aspalditik ospatzen den San Nikolas Egunari GaztARDOgi Ferixa gehitu zioten orain dela hiru urte eta aurten, abenduaren 6an burutuko den laugarren edizioan, gazta, ardoa, ogia eta bestelako produktuen izango dute protagonismoa. Aurten ere Izurtzako Udalak kupoiak banatu ditu herritarren artean pintxoa eta ardo edo txakolin trago bat doan hartzeko edo postuetan salgai dauden produktuak deskontuarekin erosteko.

Eguneko ospakizunak goizeko 11.00etan izango den mezarekin eta jarraian izango diren Mendigain taldeko dantzarien saioarekin abiatuko dira. Ordu berean frontoian izango den IV. GaztARDOgi Ferixa hasiko da eta bertan ekimenari izena ematen dioten gazta, ardoa eta ogiaz gain, gozokiak, txakolina, barazkiak eta fruituak, eztia, patea, kontserbak, lorak eta landareak izango dira. Durangaldekoak zein Errioxa,  Markina, Gernika edo Iparraldetik etorritako 19 ekoizle bilduko dira.

“Postu ikusgarrienak prestatzen dituzten ekoizleen artean 125, 75 eta 50 euroko sariak banatuko ditugu”, Luis Ballarin Izurtzako alkateak aipatu zuenez. Herriko bost edo sei artisau ere frontoian izango dira egurrez eta harriz egindako eskulanak, baita zeramikariaren eta jostunen lanak erakusteko, baina hauen partaidetza sarietatik kanpo dago.

Pintxoak

Arratsaldeko hirurak arte luzatuko den GaztAZRDOgi Ferixan, Eusko Labeldun oilaskeno pintxoak dastatzeko aukera izango da euro baten truke. “Herritar bakoitzak kupoi bat jaso du pintxo bana jateko eta kanpotik etorritakoek euro bat balio duen kupoia erosi beharko dute” Ballarinen esanetan.

Herritarrek gainera, 1,5 euroko balioa duten bina kupoi jaso dituzte eta hauekin ardo edo txakolin tragoa hartzeko aukera izango dute. Edo horren ordez bertan izango diren postuetan salgai dauden produktuetan deskontuarekin erosteko aukera izango dute. Kanpotik etorritakoek kupoiak eskuratzeko aukera izango dute, 1,5 euroren truke.