Euskal kulturaz blaitzeko oasia

[vc_row][vc_column][vc_column_text]

Milaka bisitari hartu zituen 51. Durangoko Azokak atzo, inaugurazio ekitaldia hasi aurretik, eta bost egunez euskal kulturaren “oasia” bilakatuko den Landako Gunea leporaino bete zuten Euskal Herri osotik gerturatutako ikasleek.

Gazteek izan ziren 2016ko azokaren lehen orduetako protagonistak eta ume eta gazteen joan etorriak etengabeak izan ziren. Batez ere, musika taldeen diskoak saltzen zituzten standetan zein Ahotsenea gunean izandako zuzeneko agerraldietan.

Ikasle-uholdeak eguerdira arte iraun zuen eta, ohikoa denez, lehen eguneko arratsaldea aukera ezin hobea bilakatu zen, aurtengo nobedadeak lasaitasun osoz eta behar duten arretarekin arakatzeko. Nondik hasi zen arazo bakarra, aurten aurkeztuko diren nobedadeak 349 baitira eta jarritako erakusleihoak 246.

Demode Quartet eta Julen Axiari eta Jordi Cassagneren musika doinuekin atondu dute aurtengo inaugurazio ekitaldia. Nerea Mujika Gerediagako presidenteak “azoka on” opatu zien egun hauetan Durangora gerturatzen diren guztiei: irakurle, musika entzule, sortzaile, euskara ikaste ari direnei,… Azken finean “Azoka ona izango da istorioak kontatzeko dituzuenontzat eta istorio bila zatoztenontzat ere”.

Etorkizunera begira

Atzo egindako agerpena Bingen Zupiria Kultura sailburu berriaren jendaurreko lehena zen, bere mintzaldiaren hasieran aitortu zuen bezala. Zupiriak “Azoka zaintzeko” eskakizuna egin zien antolatzaileei, Durangoko hitzordua “gure herriaren izaeraren eta kultura biziaren ezaugarririk eta ikurrik berezienetakoa” delako.

Lorea Bilbao Bizkaiko Foru Aldundiko Euskara eta Kultura Diputatuak, Azokaren inaugurazioa Euskararen Nazioarteko Egunaren bezperan izan zela gogoratu ondoren, zer ospatu badagoela azpimarratu zuen. “Gainbehera zihoan hizkuntza orain direla 30 urte” baina “gaur, zorionez, punta puntako idazleak ditugu euskaraz sortzen dutenak […] eta euskaraz sortzen den guzti hori gero eta hizkuntza gehiagotara pasatzen baita eta gero eta hizkuntza gehiagotan argitaratzen baita”.

Durango Azokaren 51. edizioa “iaz izandakoa baino garrantzitsuagoa da” Aitziber Idigoras Durangoko alkatearen ustetan, “aurtengoak sendotasuna, iraunkortasuna eta indarra” adierazten duelako. Edizio honek “bere egiten du bizi izandako mende erdia” eta “aurrerantz egiteko borondate itxaropentsua agertzen du”.[/vc_column_text][/vc_column][/vc_row][vc_row css=”.vc_custom_1480719677261{margin-top: 25px !important;margin-right: 10px !important;margin-bottom: 10px !important;margin-left: 10px !important;padding-top: 25px !important;padding-right: 10px !important;padding-bottom: 25px !important;padding-left: 10px !important;background-color: #efefef !important;}”][vc_column][vc_column_text]

Isilean lan egin dutenek jasoko dute gaur Argizaiola omen-saria

Argizaiola sari-emate ekitaldia izango da eguneko ekitaldirik aipagarrienetakoa. Arratsaldeko zortzietatik aurrera San Agustin kultur gunean egingo den ekitaldian, euskalgintzan lan oparoa egin duten ‘inurriak’ omenduko ditu Durangoko Azokak; hau da, euskara eta euskal kulturaren alde lan ikaragarria egin arren “esker onik inoiz jaso ez dutenak”, Gerediagako kideen esanetan.

25. aldiz banatzen den Argizaiola omen-saria, hego Euskal Herriko probintzia bakoitzeko ordezkari batek, iparraldeko batek eta diasporan ibilitako beste batek jasoko dute.

Horietako bi Durangaldekoak dira, Justo Alberdi iurretarra eta Zaldibarren bizi, Abadiñon hazi eta 35 urtez Chicagon bizi izan den Jose Ramon Zengotitabengoa, hain zuzen. Beste lau protagonistak Kepa Mendia arabarra, Jaime Albillos gipuzkoarra, Pantxika Erramuzpe iparraldekoa eta Mari Carmen Belaza nafarra izango dira.

Aitorpen ekitaldia hasi aurretik dozenaka proposamen gauzatuko dira Azokaren bigarren egunean, Landakon zein espazio horretatik kanpo dauden guneetan. Areto nagusian iragarritako ekitaldien artean, Elena Odriozola eta Koldo Amestoyk ‘Istorio bat… nola kontatu’ gaiari buruz izango duten solasaldia; 25 urteko ibilbidea bete duen ‘Argentinan Euskaraz’ egitasmoa aurkeztuko da edo genero azterketa oinarri izango duen ‘Eskafandra. Emakumeak, arraza eta klasea’ bilduma feminista aurkeztuko da.

EKEk eta Gerediagak lankidetza hitzarmena sinatu zutenetik 10 urte betetzen direla eta, “ipar Euskal Herriak leku eta indar berezia” izango duela iragarri zuten antolatzaileek. Izan ere, Pantxoa Etxegoinek ‘Euskal kultura eta EKE Iparraldeko Herri Elkargo bakarrean’ hitzaldia emango du.

‘Telebista, gaur eta bihar’ mahai inguruarekin osotuko dira eguneko ekitaldiak Areto nagusian, solaskideak Xabier Landabidea (Deustu), Andoni Aranburu (EiTB), Estefania Jimenez (EHU) eta Ximun Carrere (Kanaldude) izango direla.

Ahotseneako bi agertokietan Inun, Keu Agirretxea, Erraiak, Joseba B. Lenoir, Eraso, Izeberg edo Kokeinen kontzertuak izango dira, besteak beste. Solasaldietarako atondutako aretoan berriz, Juan Gorostidi, Arantxa Urretabizkaia, Antton Olariaga, Harkaitz Cano eta Jexuxmai Lopetegi, Jakoba Errekondo, Asisko edo Unai Iturriaga mintzatuko dira.

Irudienean egongo diren ekitaldien artean ‘Euskarazko zinearen sorkuntza eta kontsumoa’ri buruzko mahai ingurua azpimarratu daiteke. Solaskideak Eneko Sagardoy aktore durangarra, Maria Elorza zinegilea eta Amaia Garcia zinema-kazetaria izango dira.

Eguneko egitaraua Aiora Renteria buru duen Zea Mays taldeak ‘Harro’ disko berria aurkezteko Plateruenan emango duen kontzertuarekin osotuko da.

[/vc_column_text][/vc_column][/vc_row]