Espainiako Itzuliaren “inposaketaren” kontrako pankartak jarriko ditu Udalak

“Txirrindularitza bai!, Inposaketari ez!. Euskal Herria nazioa” lemapean Mañariko Udalaren balkoian eta errepidean pankartak jarriko dira Espainiako Itzuliarekin desadostasuna agertzeko asmoz. Horrela adostu zuten Bilduk eta EAJk azkenengo plenoan ESAITen mozio bat onartu ondoren.

ESAITek instituzioetara bidali duen mozioan “hasieratik argi eta garbi esan genuen inposaketa baten aurrean gaudela eta Espainiako itzulia, hainbat urte Euskal Herrira sartu gabe egon ondoren, aurten berriro euskal errepideetatik barrena ibiltzea eta bi etapa Euskal Herrian bukatzea, PSEk eta PPek, herri honen normalizazio politiko baten itxura emateko hartutako erabaki politiko baten ondorioa besterik ez zela”.

Bestalde, joan zen larunbatean ESAITek antolatutako bizikleta martxa pasatu zen Durangaldetik, eta bertara hainbat bizikletazale batu ziren. Antolatzaileek esan dutenez, Espainiako Itzuliaren ibilbidea alderantziz burutu, eta txirrindularitzaren alde eta inposizioen kontra egin zen martxa.

Bestalde larunbata honetan Itzulia pasatuko denez, jendea errepidera ateratzeko deia luzatu dute, “herrietan aldarrikapena zabalduz”. Urkiolako mendatera igotzeko ere deia egin dute, “aldapa erabakiorretan Euskal Herria Nazioa delaren mezua erakusteko”.

DURANGON. Mañariko albisteak