Elorrioko 2021eko aurrekontuek ongizatea lehenetsi eta gizarte arloko diru-atala %56a igoko dute

Elorrioko Gobernu Taldeak 7,8 milioi euroko aurrekontua aurkeztuko du 2021 urterako eta herritarren ongizatea lehenesteko helburuarekin %56a igoko du gizarte-arloko kapitulua. Ogasun batzordeari aurkeztutako proposamena udalbatzak onartu beharko du.

Aurreikusitako aurrekontua egiteko orduan Udal ordezkariek kontuan izan dute udalak jasoko duen diru kopurua 1.288.000 eurotan jaitsiko dela, hau da, %14,11a. Hala ere, “izaera  soziala” duten proposamena aurkeztu dute “osasun krisiaren ondoriozko egoera sozialei eta ekonomikoei” aurre egiteko helburuarekin, Gobernu Taldeko kideek esanetan.

2021eko aurrekontuetan egongo den aldaketa esanguratsuenetako bat inbertsioen atalean egongo da ohiko gastua ez den oro ia guztiz murriztuko delako. “Horrek ez du esan gura ez dugunik inolako proiekturik gauzatuko. Urteak aurrera egin ahala, egoerak horretarako aukera ematen badu, gerakinarekin inbertsioak egingo ditugu”, Idoia Buruaga alkateak aurreratu duenez.

Hala ere, Udalaren lehentasun bakarra “pertsonen ongizatea da”, Buruagaren arabera. Hori dela eta, tokiko elkarteen diru-laguntzak eta bestelako laguntzak jarraipena izango dute eta gizarte-arlora zuzendutako kopurua %56a igoko da, aurtengo 153.000 euroetatik datorren ekitaldiko 240.000 euroetara pasatuz.

Aurrekontuan aurreikusitako berrikuntzetako bat udalerriko gune historikoan zuntz optikoa instalatzeko diru-laguntza lerro berria sortzea planteatu da.

Tokiko merkataritza eta ostalaritza suspertzeko aurten bideratutako 15.000 euroko partida handitzea aurreikusten da. “Ekintzaileei lagundu gura diegu, jarduera bat hasi dezaten edo belaunaldien arteko errelebuaren bitartez dagoeneko martxan dauden saltokiei jarraipena eman diezaieten”, zehaztu du alkateak.