Elkarlana ardatz abiatuko da Azokaren 47. edizioa

Euskal kultur kate osoaren topalekua den Durangoko Liburu eta Disko Azokak, 400 nobedadetik pasatxo eta 300 ekitalditik gora eskainiko ditu. Kultura ijitoa izango da aurtengo gonbidatua eta Argizaiola saria Benito Lertxundi musikariak jasoko du. Elkarlana  ardatz, abenduaren 6tik 9ra bitartean zabalduko ditu ateak 47. edizioak.

Gerediaga Elkarteak gaur goizean egin duen Azokaren aurkezpenean aurreratu duenez, aurtengo ardatz nagusia elkarlana izango da, “guneak kudeatzen, enpresa txikiekin, hornitzaileekin eta babesa ematen duten erakundeekin”.

Edizio honetan 253 stand izango dira Landako erakustazokan liburu, disko, teknologia-gai eta bestelako proposamenen artean. Aiert Goenagak zuzendariak aurreratu duenez, nobedadei dagokionez 289 liburu, 65 disko, 32 aldizkari, 7 argitalpen elektronikoak eta 18 bestelakoak izango dira bertan.

Aurkezpenean izan diren partaideek, Aitziber Irigoras Durangoko alkate andreak, Blanca Urgell Eusko Jaurlaritzako jarduneko Kultura sailburuak, eta Miren Dobaran Aldundiko Euskara zuzendariak, krisiaren eragina nabarmendu dute. Hala ere, Azoka “garai berrie egokitu eta aurrera egiten duen ekimena da”.

”Aurten ere kontestu ekonomikoa desafioa izan da baina ez baldintzatzailea. Lau egun izango ditu aurten Azokak, bai, baina bertan eskainiko denak bai, kalitatez zein kopuruz, lehen mailari eutsi dio. Harro egoteko moduko egitaraua daukagu, pozik gaude”, azaldu du Nerea Mujikak, Gerediagako presidenteak.

Erromintxelaren berezitasuna

Kultura ijitoa izango da aurtengo kultura gonbidatua eta Kale Dor Kayiko elkartea izan da elkarlanaren koordinazioaz arduratu dena. “Kultura ikusezin bezain zein urrunekoa da gutako hainbatentzat. Baina, bizilagun ditugu gure komunitatean”, azaldu du Mujikak.

Kale Dor Kayiko irabazi asmorik gabeko kultura elkartea da. Bere presidentea, Tío Manuel Bizarraga, oso “hunkituta” zegoela adierazi du aurkezpenean, “Euskadiko bihotzean izateagatik”. Presidenteak azpimarratu duenez, “lema bat daukagu: elkar ezagutu, elkar aitortu eta elkar errespetatu, baina zoritxarrez hau ez da betetzen”. Aldi berean, Erromintxelaren kasua aipatu du presidenteak, Romaní –hitzak eta euskararen gramatika uztartzen  dituen, “euskal ijitoen hizkuntza”, hain zuzen ere.

Bestalde,  aurtengo edizioko Argizaiola saria  Benito Lertxundi musikariak jasoko du. 60. hamarkadatik hona erreferente izan da euskal musika sorkuntza eta kulturgintzan. Gainera, Azokarekin izan duen lotura estua izan da hasieratik; “izan ere bigarren ediziotik egon da gurean presente”. Abenduaren 6an izango da ekitaldi berezia.

DURANGON. Durangoko albisteak