Durangoko lagun talde batek KMovie lehiaketako bigarren saria eskuratu du

4.000 euroko saria bi minutuko laburmetraiagatik. Hori da Durangoko seikote batek K-Movie ikus-entzunezko lehiaketan eskuratu duen saria. Beraiek sortu, ekoitzi eta filmatutako ‘Zaunk’ pelikulak bigarren saria eskuratu du Bizkaiko Foru Aldundiko Kultura Saileko Kirol eta Gazteria Zuzendaritzak, Azkue Fundazioarekin lankidetzan antolatutako lehiaketan.

Gazteen artean euskararen erabilera sustatzeko asmoa duen K-movie lehiaketa hasi aurretik, pare bat jardunaldiko ikastarotxoa egin zen Durangon. Bertan, telefono, tablet edo gazteek eskura dituzten antzerako tresnekin, pelikula bat nola egin daiteken ikasi ahal zen. Eta hara joan ziren Ixone Aroma eta Aritz Lasarguren, zerbait egiteko asmoarekin.

“Aritzek eta biok argi geneukan gure laburmetraiaren protagonista txakur bat izango zela eta ikastaroan zegoen Asier Verak antzerako ideiarekin zebilen. Bat egitea erabaki genuen”, Aromaren esanetan. Jatorrizko ideia pelikula gauzatzeko, antzezleak eta laguntzaileak behar zituztela eta, lantaldea Saioa Agirre, Gorka Madrazo eta Nerea Arregirekin osatu zuten. Ah!, eta Mara txakurrarekin.

Arratsalde bakar baten egindako filmaketaren ondoren, irudiak muntaketa egiteko prest zeuden eta eginbehar horretan hainbat ordu eman zituen Asierrek. Ekoiztutako filma antolatzaileei bidali ondoren, pelikula guztiak ikusgai jarri ziren eta edonork eman zezakeen botoa. Lehen fasean hogei pelikulak egin zuten aurrera eta horietatik hamar finalera pasatu ziren. K-Movie lehiaketako sarituak epaimahai batek erabaki zituen.

Bi minutu baino gutxiago

‘Zaunk’ laburmetraiaren argudioan kritika eta umorea uztartzen dira. “Gorka da pelikularen protagonista. Mutila kaletik doa bere txakurrarekin eta topatzen dituen lagun guztiak gaztelaniaz mintzatzen dira berarekin; eta txakurrarekin berriz, euskaraz”. Behin eta berriro errepikatzen den egoeraz haserre, txakur mozorroa jantzita irtengo da kalera…

K-Movie lehiaketak bi baldintza nagusi zituen, besteak beste. Alde batetik 18 eta 30 urte arteko gazteek parte har zezaketen eta pelikulak bi minutu baino gutxiago iraun behar zuen.

‘Zaunk’ http://vimeo.com/m/102104093 helbidean dago ikusgai.