Durango ikertzaile euskaldun gazteen topagunea bilakatuko da aste honetan

Durangoko Landako erakustazoka, Plateruena Kafe Antzokia eta Landako Elkartegia euskal ikertzaile euskaldun gazteen topagunea bilakatuko dira, aste honetako asteazkenetik ostiralera bitartean burutuko den IkerGazte 2015 kongresuaren lehen edizioarekin. UEU-Udako Euskal Unibertsitateak antolatutako ekimen honek, alor desberdinetako 200 aditu bilduko ditu.

UEUk orain arte arloz arloko profesional eta ikertzaileen bilkurak antolatu baditu, oraingoan “arlo guztietako ikertzaile euskaldunentzako bilgunea osatu nahi dugu” ekimenaren bultzatzaileen esanetan. Maiatzaren 13tik 15era bitartean giza zientziak, gizarte-zientziak, zientzia zehatzak, teknologia eta arkitektura edota osasun alorretako 120 aurkezpen burutuko dira, batzuk ahoz eta besteak panelen bidez.

“Ikertzaile gazteen aldetik azken urteotan izan den hazkundea” kontuan izanda, UEUkoen xede nagusia “haiek bildu eta ikusgarritasun handiagoa ematea” lortu nahi dute IkerGazte 2015ekin. Durangon izango den lehen kongresuan tesia bukatzen ari diren edo azken lauzpabost urteetan amaitu dutenek bilduko dira.

IkerGazte 2015 maiatzaren 13an hasiko da Paul Zachary “PZ” Myers irakasle estatubatuarrak emango duen inaugurazio hitzaldiarekin. Gainera beste bi hitzaldi nagusi tartekatuko dira egitarauan, biak maiatzaren 14an. Bata, UEUko zuzendari ohia eta egun UPV/EHUko irakaslea eta ikertzailea den Karmele Artetxek emango du; bestea, UPV/EHUko Hizkuntzalaritza, Euskal Ikasketak saileko katedraduna eta Elebilab ikerketa taldearen zuzendaria den Itziar Laka izango du hizlari.

Mintegiak

Iragarritako aurkezpen ekitaldiak goizez izango badira, arratsaldetako egitarauan tailerrak, mahai inguruak edo mintegiak tartekatuko dira. Gainera, hainbat saio osagarri prestatu dira, esaterako Durango edo Urkiola ezagutzeko ibilbideak edo Laburbira film laburren emanaldia.

Lehen kongresu honek parte hartzaileen aldetik izan duen harrera ona kontuan hartuta, UEUkoek prest daude bigarren kongresu bat antolatzeko. Hala ere, antolatzaileek ukatu egin dute urtero burutuko den ekimen bat izango denik, “gure asmoa bi urtez behin egitea delako”. Tokia ere aldatu egingo dute eta litekeena da hurrengoa Iruñean izatea.