Eusko Jaurlaritzak 20.000 ikasletik gora eskolaz kanpoko ekintzarik gabe utzi ditu

Eusko Jaurlaritzaren Hezkuntza Sailak, eskolaz kanpoko jarduera osagarriak biltzen dituen ACEX programa osatzen duten proiektuen ia erdia bertan behera uztea erabaki du. Hezkuntza sailaren baitan sortutako proiektu honek, azken sei urteetan murrizketa handiak jasan ditu. Besteak beste, erretiroa hartzen zuten irakasleak, lanaldi erdian dauden profesionalek ordezkatu behar izan dituzte. Gainera, eskola berriei programara batzeko aukera itxi diete.

Hogei urtetan zehar, proiektu hauek liburutegiekin, teknologia berriekin, arte plastikoekin, eskola kirolarekin zein ingurumenarekin lotutako ekintzak garatu dituzte. Eskoletako irakasleek zuzendutako programa hauek, eguerdiz zein arratsaldez – klaseak bukatu ondoren- ikasle guztiei irekita dauden doako jarduerak eskaintzen dituzte. Azken urteetan ordutegiak mugatu badira ere, ACEX osatzen duten ekintzek ikasleen integrazio sozial zein intelektuala hobetzen lagundu dute. Programaren barruan dauden 194 eskola publikoek, aisi-uneetan eginiko jarduera hezigarrien bidez, eskola orduetan eginiko lana osatzeaz gain, lanaren eta familiaren uztarketa erraztu dute.

Eginiko lana, hezkuntza komunitateko eragile guztiek aitortu dute, hala nola, familiek, ikasleek, irakasleek zein Hezkuntza Sailak berak. Udalek ere modu positiboan baloratu dituzte proiektu hauek eta irakasleei eta kasu askotan, euren ekintzak burutu ahal izateko erraztasunak eman dizkiete.

Lehen aipatutakoa gora behera, Eusko Jaurlaritzaren Hezkuntza Sailak, datorren ikasturtean 94 proiektu bertan behera uztea erabaki du. Lanaldi erdian diharduten irakasleek gidatutako programa hauek ezabatuta, 20.000 ikaslek baino gehiagok orain artean doan jasotzen zituzten ekintza hauek, gurasoek euren diruarekin ordaindu beharko dituzte.

Jarduera hauek burutzen ditugun irakasleok ohartarazi nahi dugu, murrizketa hauek izen-ematea doakoa den eskola publikoetan emango direla. Hauek, kaltetutako giroetan bizi diren umeen integrazio sozial zein kulturala ahalbidetzeko ezinbestekoak dira. Horregatik, Eusko Jaurlaritzaren Hezkuntza Sailak hartutako erabakia bidegabea dela uste dugu, lehen aipatu ditugun ikasleak izango baitira, beste behin ere, murrizketen ondorioak pairatuko dituztenak.

ACEX Programa osatzen duten irakasleak