Berbaro elkarteak irudi eta goiburu bereziak estreinatu ditu taldearen
30. urteurrena ospatzeko

Berbaro elkarteak aurten bere 30. urteurrena ospatzen duela eta, irudi eta ‘Geroa aldean’ lema berezia estreinatu ditu. Urtean zehar egingo diren hamaika ospakizun prestatzeaz gain, ekitaldi nagusia ekainaren 1ean egingo den jaialdia izango da.

Berbarotar guztientzat “urte berezia izango da 2019a”, nahiz eta are bereziagoa izan zen 1989a, “Durangon euskaraz bizitzeko espazioak sortu guran Berbaro jaio zenekoa”. Urtemuga biribila “ilusioz” eta ospatzeko gogoaz hasteaz gain, “orain arte egindako bidearekin harro” egotekoa dela diote eta “biharko erronkei ilusioz heltzeko urtea izatea gura dugu”, elkarteko kideen esanetan.

Urteurrenak “egin gura dugunaz pentsatzeko, eta herriko bizia eta euskara astintzeko” aukera emango diela uste dute berbarotarrek. Horregatik, ‘Geroa aldean’ aukeratutako goiburuak, aurrera begiratuta lanean jarraitzeko gogoa eragiten die “Durangoko euskaltzaleekin batera”.

Prestatutako ekimenen artean “hausnarketa prozesu bat, jolaserako eta kulturaz gozatzeko hainbat ekintza” iragartzen dituzte. Ekainaren 1erako berriz, jaialdia antolatu dute, “egun osoko egitarauarekin”.