Azken uneko hitzorduak

Laugarren eta azken eguna duen 49. Durangoko Azokak, hainbat ekitaldi interesgarri dastatzeko aukera eskainiko du, tarteko Gogoetaren Plazan egongo diren ekitaldiak.

Areto Nagusian egongo diren solasaldiak Berri Txarrak taldeko Gorka Urbizuk Uxue Alberdi kazetariarekin izango duenarekin abiatuko dira eta eguerdian Maialen Lujanbio eta Niko Etxart kultur transmisioari buruz mintzatuko dira. Arratsaldean “Kultur transmisioaren korapiloa” askatzen saiatuko dira Jon Sarasua pentsalaria, Ander Lipus antzezlea eta Mari Jose Olaziregi Etxepare Institutuko euskararen sustapen zuzendari eta literatura aditua.

Eguneko beste hitzordu interesgarria Szenatokian izango da bertako oholtzan estreinatuko baita Organik dantza konpainiak eta Kepa Junkerak elkarlanean sortutako ‘Txapeldun’ ikuskizuna.

Ahotseneako zuzenekoen karpan Behi bi blues, Markos Unzueta edo Haxotz taldeen kontzertuak izango badira, solasaldien karpan Jon Arretxe, Joseba Irazoki edo Xipri Alberbidek euren lanak aurkeztuko dituzte. Kabi@n, ‘. eus ekimenaren aurkezpena enpresari begira’ izango da.

Irudienean izango den Kameratoiaren sari banaketaz gain ‘Dabilen harriari goroldiorik ez’ dokumentala eta ‘Aulki hutsak’ filma emango dira
Saguganbaran ‘Pupu eta Lore euskaraz jolasten!’ aplikazioa aurkezteaz gain, Toni La Salen ‘Ipuin lapurra’ txotxongilo agerraldia eta Maite Frankok eskainiko duen ‘Okzitaniako ipuin zaharrak’ ipuin kontaketa nabarmenduko dira.

Plateruenan izango diren azken bi kontzertuetako protagonistak Saioa eta Kometa izango dira.