Amankomunazgoak bat egin du elikatzeko ohiturak aldatzeko helburua duen FAct programarekin

Durangoko Merinaldearen Amankomunazgoak bat egin du Ekintza Globalerako Programa (Global Action Plan) nazioarteko erakundeak eratutako FAct! (Food Action) egitasmoarekin. Europako bost herrialdetan abian den ekimen honen helburua, herritarrek elikadurari, osasunari, hondakinen ekoizpenari eta klima aldaketari buruz dituzten ohiturak aldatzea da.

Jarritako helburua gauzatzeko asmoarekin, FAct! programak laguntza ematen die herritarrei “elikatzeko ohiturak alda ditzaten”, ekimenaren bultzatzaileen esanetan. Aholku praktikoak ematen dituzten zenbait eskulibururen bidez, elikagaiak alferrik ez galtzea, berotegi-efektuko gasen isurketa murriztea eta herritarren osasuna hobetzea lortu nahi da.

Izan ere, urtero 7,7 milioi tona elikagai botatzen dira zaborretara eta 170 milioi tona CO2 isurtzen dira elikagaien xahuketarekin lotuta. Gainera, azukre, gatz, koipe eta elikagai prozesatu gehiago kontsumitzen dira eta 2 motako diabetesak eta gizentasunak eragindako gaixotasunek 300.000 milioi euroko osasun-gastua egoten du Europar Batasunean.

100 euroko erosketa-otzara

Durangoko Merinaldearen Amankomunazgoak ekimenari lotutako programa pilotu baten lehen fasea jarri du abian. Hori dela eta, 2017ko maiatzaren 2a baino lehen Amankomunazgoaren webgunea erabiliz (http://www.mdurango.org/es-ES) izena ematen duten pertsona guztien artean, 100 eurotan baloratutako erosketa-otzara ekologiko bat zozkatuko da, EROSKIri esker.

Bestalde, Hungarian, Alemanian, Italian, Suedian eta Espainian erabilgarri dagoen http://fact.globalactionplan.com/es webgunea ireki zuten martxoaren 15ean. Bertan, FAct! programa berritzaileari buruzko informazio guztia eskuragarri izateaz gain, online dagoen liburutegia kontsultatu edo zenbait txosten eta dokumentu deskargatu daitezke.