600 ekarpenetik gora egin dituzte elorriarrek Aldapebeitiari buruz

Herritarren 600 proposamenetik gora jaso ditu Elorrioko Udalak Aldapebeitia jauregiaren etorkizunari buruz, ‘Aldapebeitia Aldaberritu’ prozesu parte-hartzailearen baitan. Maiatzaren 15ean martxan jarritako ekimen horrekin, etorkizunean zein erabilerara bideratu nahi duten eraikuntza adierazteko aukera izan dute herritarrek.

Hamar urtez itxita egon ondoren, jauregiaren jabe den Udalak, ateak ireki zizkien herritarri, eraikina barrutik ezagutzeko aukera emanez. Antolatutako bisita gidatuetan, libreetan zein antzeztuetan 530 pertsona igaro direla adierazi dute udal ordezkariek.

Herritarren partaidetza baloratzerakoan “oso emaitza onak izan ditugu, bai kopuruz eta baita ekarpenen kalitateagatik”, adierazi du Idoia Buruaga Elorrioko alkateak. “Nabaritzen da jendeak badituela proposamenak eraikin honetarako, eta hori da garrantzitsuena, guztion artean proposamenak egin, horiek baloratu eta ahalik eta ondorio adostuenetara heltzea”, gehitu du.

Jasotako ekarpenak elorriarrei azaltzeko eta beraiekin partekatzeko asmoarekin, bilera ireki bat deitu du Udalak ekainaren 13erako. Solasaldia udaletxean izango da arratsaldeko 18:30ean.

Udaleko Gobernu taldeak jauregiari buruzko bere proposamenak izan ahal baditu ere, “ez genuen eraikin hau gure ideiekin soilik ‘hipotekatu’ nahi, uste baitugu horrelako proiektu batek adostasun zabal bat behar duela”, Buruagaren arabera.